Él (1)

Ta saliendo nos medios, como él quier, l’anuncia de qu’él va proponer que l’Asturianu nun seya “minor” nin “mayor”, non, él va proponer el desanicie total de l’Asturianu na Universidá. Diz él, amás, que la cosa ye que nun hai demanda social, que d’ónde se saca qu’hai demanda, que sólo son grupúsculos minoritarios, que…bono, diz munches coses él. ¿Sabrá lleer él? ¿Tará al día en llectures d’encuestes sociollingüístiques n’Asturies, él? ¿A qué dedicará’l so tiempu llibre, él? Anuncia al altu la lleva que va pidir la votación secreta pa que naide tenga mieu a la hora votar. Nun se decata él que metus interpres semper in deteriora inclinatus. Y que na Xunta d’esa Facultá lo qu’ha imperar ye la filoloxía, non el mieu, non la política, non el politiquéu baratu. ¿A cuentu de qué mete él a IU na Facultá y nes sos argumentaciones? ¿Qué tien que ver IU col Asturianu que nun tengan que ver PSOE, PP, BA, UNA, CCOO, UGT, SUATEA,… y el Colexu oficial de notarios. Oseya tola sociedá asturiana? ¿Por qué vincula él la Llingua d’una Comunidá con unes sigles?¿Quién ye él pa facer eses aseveraciones si nun tien pesu específicu dalu? ¿Qué manera tan torticera, restorcía y chabacana de facer seudopolítica llingüística ye ésta, cuando lo qu’él debía facer ye estudiar, estudiar, estudiar y ponese al día y dexar en paz les cuestiones polítiques dientro la Facultá? ¡Que se ponga él a estudiar Llingua Asturiana y nun maree la perdiz! ¿Demanda social quier, él? ¿Qué pasaría si desixéramos demanda social p’asignatures como llatín, griegu, árabe…? ¿Por qué na Facultá d’Uviéu puen estudiase eses llingües y la llingua propia d‘Asturies non?¿Por qué nunca diz qué diferencia a eses llingües de la llingua asturiana, dende un puntu de vista estrictamente glotolóxicu? ¿Quo usque…? ¿Tolos que salieron na so defensa ante les gravisimísimes ufienses y ataques de calter cuasiterrorista que careció él dempués de la cabera votación, que nun lu dexaron nin dormir, van tapecese agora nel secretismu del votu pa desaniciar una llingua d’una facultá de filoloxía? ¿Van parase a pensar esos “colegues” que tanto s’escandalizaron, o aquellos que votaron a la escontra de la propuesta de l’anterior Decana, qué nome recibe un profesor de medicina que nun quier que s’estudie l’anatomía del deu meñique del pie porque ye un deu que nun val pa ná y nun tien demanda social? ¿O qué nome hai que da-yos a los profesores de derechu que quixeren desaniciar el derechu romanu porque ye mui antiguu y nun tien demanda social? Pensái por un momentu qu’un “profesor”, él por exemplu, tien que decidir si los estudiantes de Filosofía tienen qu’estudiar la filosofía de la Grecia clásica, cola montonera d’años qu’hai que morrieron tolos filósofos de la Grecia clásica y la poca demanda qu’esos filósofos tienen na sociedá… ¿Qué nome hai que da-y a él cuando pidi tales coses? Pues el mesmu que cuando pidi que nuna Facultá de Filoloxía nun s’estudie una llingua. Más entá cuando ye la llingua propia de la comunidá na que ta asitiada esa Facultá, que-y da de comer a él. ¿Por qué naide suspende a él y lu pon a estudiar otra vuelta la carrera? Porfa, señor decanu…Taréis pensando…¿pero quién ye él? Home sí, ta naguando por salir na prensa y ser el mártir de la causa y voi yo a dicivos el nome d’él…Ala, ¡a ver la ballena! él.

Berto Cobreros

(1) Nel Blog http://blog.educastur.es/rosarioasturiesotrabayes/2008/08/ . Ochobre de 2008