Encuesta sociollingüística del Conceyu de Xixón. (1)





En Xineru d’esti añu, presentóse nel Centru Municipal d’El Llano de Xixón el llibru L’Asturianu en Xixón. Primer encuesta sociollingüística municipal del que son autores y coordinadores los profesores Llera Ramo y San Martín Antuña xunto col Equipu Eskobarómetro de la Universidá del País Vascu. Nel actu taben presentes el Direutor de la Oficina de Política Llingüística del Principáu, la Conceyala d’Educación de la Casa Conceyu de Xixón y disculpó la non aistencia la Presidenta de la Academia de la Llingua Asturiana.

De tolo dicho ellí, que nun foi nuevo na so mayor parte, solamente vamos destacar delles frases que’l profesor Llera Ramo dixo nel actu y que, recordemos, ye:

- Per un llau, un investigador asturianu na Universidá del País Vascu (lleenda urbana él mesmu, Sr. Areces), cadráligu pa más señes, con un llabor d’investigación sociollingüística n’Asturies braeramente importante, seriu y rigorosu (¡ diga lo que diga la Sr. Migoya ! A la que nun podemos considerar indocumentada, sinón más bien malintencionada, nes sos crítiques vertíes en Febreru nel Canal 10 de tv). Efeutívamente, les sos encuestes, quiciás permanoseaes en delles ocasiones, son un referente cuasi tópicu pa tou defensor de la Llingua Asturiana en cualisquier foru nel que s’alcuentre.

- Per otru llau, Llera Ramo ye un ¡miembru del partíu socialista obreru español!, el mesmu partíu que torga los drechos fundamentales de toles persones que deciden falar asturianu n’Asturies. La única llingua que nun ye obligatoria n’Asturies (recordemos que les obligatories son: l’español, per un llau y l’inglés o francés, depende los casos, per otru. Porque los rapazos/es tienen qu’escoyer una d’estes dos, pero tienen qu’escoyer una obligatoriamente. Tamos falando de la enseñanza, por supuestu. Anque igual nos da falar del ente públicu de radiu televisión asturiana: ¿llingües obligatories?: l’español, per un llau, y l’inglés o francés per otru. ¿L’asturianu?: NON TAL. ¿Siguimos?...).

Bien, dalgunes de les frases que dixo esti socialista atípicu ( güeyu, atípicu porque caltién la so postura favoratible al Asturianu dientro y fuera’l partíu, non como otros que tán apuntaos a instituciones onde dicen bla, bla, bla... cola boca llena y llueu nel partíu nun gorguten, na prensa nun gorguten, nun denuncien les polítiques del so partíu....). Dalgunes de les frases fueron estes:

- Los gobernantes d’Asturies tán gobernando ensin escuchar al pueblu (sic). Cierto, totalmente cierto: ¿nun recuerda esto a ciertu despotismu illustráu, de sieglos pasaos, cuando se gobernaba pal pueblu pero ensin el pueblu? ¿Nun ta claro que los nuestros gobernantes tán demasiao cerca de dómines predemocrátiques? ¿Dalguién nun tien claro entá que cuando falen de la llingua d’Asturies mienten como bellacos? ¿Cuántes encuestes han facese pa qu’escuchen lo que la mayoría la xente diz? ¿Qué tán esperando, que salga dalguna favoratible a la so postura pa entós poder dicir: mirái agora yá tenemos consensu: la xente nun lo quier. Ye eso ¿non?....Andái...dir a ver la ballena....

- Los políticos asturianos (que se sabe que falen asturianu na cafetería la Xunta, por exemplu, añadimos nós) tienen que salir del almariu, tienen que curase del sarpullíu que-yos sal en cuantes falen del Asturianu (sic). Y yo propongo esta frase como lema pa toles campañes de reivindicación llingüística. Daqué asina como: ¡ariu, ariu, ariu que salgan del almariu!. Prestoso ¿eh?.

Pero vayamos col llibru.

Ye, como toles encuestes feches nesti sen, perinteresante. Lo primero qu’hai que dicir ye que los resultaos nun se separten muncho d’anteriores encuestes. Hai una mayoría que ta a favor de la Llingua Asturiana, que dixebra l’Asturianu del Español y d’otres llingües, que quier midíes de proteición pa la Llingua pente medies de la oficialidá na prósima reforma del estatutu, que nun siente estigma llingüísticu, que suspende a les instituciones del gobiernu del Principáu y del de la ciudá en cuantes a xeres desendolcaes pa la proteición de la llingua, qu’amuesa una competencia llingüística asturiana abondo sólida, anque nun atope sofitu institucional, que-y pidi al so Ayuntamientu que s’implique más na promoción del usu y la presencia pública de la llingua, que nun “ve” la llingua pela ciudá, fasta’l puntu que mui poca xente sabía de la Oficina de Política llingüística. Lo cualo confirma les nuestres tesis defendíes hai un añu nesti Boletín sobre’l tapecimientu a que la tienen sometía...

Tamién ye verdá que “por cuenta del caráuter sociolóxicu eminentemente popular, de les cases más asturianizaes, el riesgu de la marcha atrás ye mayor (...)polo que faen muncha falta polítiques normalizadores empobinaes a les zones de clases medies, sofitando’l prestixu social y la dignificación del asturianu.”

Ye esti llibru un preséu fundamental pal gobiernu municipal de turnu (seya del signu políticu que seya) que de verdá quiera facer una política llingüística realista, sofitada en dalgo concreto y con perspeutives de futuru, porque da una visión muncho detallada de lo que la sociedá xixonesa fala, siente y camienta pal futuru de la Llingua. Y, amás, failo per barrios colo cualo puen aplicase les polítiques llingüístiques “a la carta”. Si de veres se tienen esmoliciones lligüístiques (cosa que duldamos enforma de tolos partíos que se sienten nes cámares representatives a cualisquier nivel) yá nun hai disculpes pa nun aplicales con ésitu. Nesta encuesta, y nes demás que tien espublizaes esti socialista atípicu, pue vese y lleese’l famosu consensu que tanto busca’l psoe, ye dicir una mayoría de la población que nagua pola oficialidá nel estatutu, que quier porteición y enseñanza del asturianu, etc; un gobiernu mínimamente democráticu yá nun pue siguir calteniendo esti tipu de postures predemocrátiques y llueu “volcase con delles minoríes” coles que-yos presta volcase (la muyer, los gays, los xitanos,... Y nel planu internacional, que ye’l que más-yos presta, si nun tienen minoríes coles que volcase, nun vos estrañe que defendan les formigues prietes del Sudán, los cascoxos coloraos de Madagascar,...).

Yá , yá sabemos qu’agora ta de moda falar de la futura obligatoriedá, casu de que la Llingua fuere oficial. Toos sabemos que la consigna llanzada dende la FSA ye: mirái, si facemos la Llingua oficial tamos obligando a tola población a falala; poro, ye meyor nun facela. Les demás llingües d’España sí pueden ser oficiales porque ellí nun implica obligatoriedá, pero equí sí bobinos, equí si facemos l’Asturianu oficial eso ye obligatoriedá. Van camudando les disculpes dende hai más de venti años, agora toca “la obligatoriedá”. Señores, si mañana un asturianu billingüe – d’asturianu/español- sal a la cai y entama a falar n’inglés, inclusu n’alministración, ¿qué va pasar?: NÁ DE NÁ, porque bien llueu vamos facenos entender por él y vamos facer qu’él nos entienda. Si esa persona sal a la cai y entama a falar español inclusu n’alministración, ¿qué va pasar?: NÁ DE NÁ, porque bien llueu vamos facenos entender por él y vamos facer qu’él nos entienda. Por embargu, ¿qué pue pasar si entama a falar asturianu?: RISES, COMENTARIOS DESPEUTIVOS, INSULTOS, REFUGA DE PAPELOS N’ALMINISTRACIÓN (la última refuga d’un papelu foi fecha na mesma casa qu’entamó la Encuesta: La Casa Conceyu de Xixón)..., oseya: RECHAZU. Polo tanto les úniques llingües obligatories, si quies que nun te rechacen n’Asturies, son l’español y cualisquier llingua estranxera.

A la vista d’esta situación retorcía, kafkiana, surrealista que se da nesta parte’l mundu onde la illusión del presidente ye facer d’Asturies un gran parque temáticu (sic) (y nós ¿qué vamos ser los monos o los guíes?), una vegada más entrugámonos:
¿Serán capaces IU-BA, socios de gobiernu, de sacar les conclusiones afayaíces, los argumentos fitos, etc, de cara al famosu Pautu, de cara a les rellaciones col PSOE, de cara a establecer una Política Llingüística coherente na Casa Conceyu, de cara a amosar d’una vez por toes el famosu consensu qu’anden buscando los gobernantes del psoe y que nunca alcuentren, de cara a la reforma l’estatutu, ...? O siguirán viéndoles venir...O será tarde yá pa poner les conseyeríes/conceyalíes enriba la mesa si nun-yos faen casu (o ye qu’esti asuntu nun merez un órdago, como otros...¿l’últimu?: la incineradora) O......¿qué...?


Berto Cobreros


(1) Mayu 2006