La Oficina Municipal de la Llingua- Xixón. (1)

El día 15 de xineru de 2004 aconceyáronse, na Casa de Nava de Xixón, una serie de sindicatos y asociaciones citaos pola responsable de la Oficina Municipal de la Llingua (O.M.Ll.) del Aytu. de Xixón, col envís de constituyise en Conseyu Asesor de la mesma. Los sindicatos y asociaciones asistentes foron: FETE-UXT, SUATEA, Conseyu de la Mocedá, Periodistes pol Asturianu, Xunta pola Defensa de la Llingua y Cultura Asturianes, Academia de la Llingua, Foru Arte-Ciudá, Tertulia Cultural “El Garrapiellu”, Conceyalía d’Educación, Cultura y Llingua Asturiana, Xunta rectora de la F.M.C. y la propia Oficina. Echóse en falta un/a representante del sindicatu CC.OO.

L’orde del día foi:

1- Presentación del Conseyu Asesor y les persones que lu formen.
2- Presentación de los oxetivos de la O.M.Ll. (tán nel sindicatu a disposición de toles persones que los soliciten)
3- Proyeutos de la O.M.Ll. pal añu 2004.
4- Ruegos y entrugues.

Lo primero que se nos desplicó foi’l cambéu de nome, recordái que diba llamase “Oficina de normalización llingüística”, de resultes d’un vetu por parte del representante del PSOE nel Pautu de Gobiernu hacia la pallabra “normalización”. ¿Motivu?: “no se puede normalizar una lengua que no es oficial”. ¿Suénavos la babayada?...(“pasarán más de mil años muchos máaaaasss”...)

Los aistentes apautaron convertise en Conseyu Asesor, planificando reuniones periódiques nes que puedan vese los llogros de la Oficina, dir dando idees y propuestes y tentando de llevar alantre’l trabayu de la O.M.Ll. d’una manera realista, digna y positiva.

El SUATEA, pente medies del so representante, criticó, nun primer momentu, el Pautu de gobiernu ente’l PSOE-IU/BA, polos motivos de toos/es conocidos y que nun vamos repetir equí; trazó un brevísimu panorama del “pasáu” históricu reciente de la Llingua nel Aytu. de Xixón nel que remembró les poques coses que se ficieron y cómo tolo que se fexo foi a base de regatiar concesiones, que diben cumpliéndose “tarde, mal y nunca”. Fexo, tamién, un reconocimientu a la persona que llogró cuasi tolo que l’Aytu. fexo en materia de normalización de la Llingua Asturiana. Analizó una per una toles dependencies municipales onde ye necesario influyir tresversalmente nel sen d’una real normalización llingüística. Apurrió otres estayes onde ha normalizase la llingua: AA.VV., Biblioteques, Empreses, Comerciu, Arte y Música, Colexos, etc. Y encamentó que les actuaciones futures de la Oficina tuvieren encaminaes a normalizar eses estayes que, fasta güei, tán n’ayén no que cinca a la so asturianización.
Caún de los asistentes apurrió idees, no qu’a ellos cincaba, nes que la O.M.Ll. debía tar presente y influyir.
Too ello foi recoyío pola so presidenta que, en tou momentu, amosó una actitú positiva de recepción d’idees y un compromisu de llevar alantre un llabor seriu, posáu y realista... colos medios que-y dan. Naquel momentu nun cuntaba con alministrativu/a billingüe nin con personal d’apoyu, tampoco con un almacén, nin una biblioteca.

Conformen los proyeutos de la O.M.Ll. : unos oxetivos xenrales, unos oxetivos específicos a curtiu, mediu y llargu plazu, una páxina web, un serviciu d’asesoramientu llingüísticu y torna de documentos, un cursu de llinguax alministrativu pa personal municipal, un cursu d’aniciu a la llingua asturiana pa conceyales y personal municipal, la promoción de la llingua asturiana ente los escolinos de 5º y 6º de primaria, la creación del premiu de rellatu infantil “Mª Teresa González”, alcuentros de la mocedá cola llingua, unes xornaes sobre la normalización de les llingües nos Conceyos, una edición de un calendariu escolar pa les escueles, un estudiu y análisis de la realidá sociollingüística del conceyu de Xixón y un conveniu de collaboración firmáu cola Academia de la Llingua Asturiana.

Dende’l sindicatu valoramos positivamente que la recién creada O.M.Ll. cuente con bayura de proyeutos y idees, lo mesmo que l’enfotu que la so presidenta amosó en tou momentu; camentamos como fundamental el trabayu de normalización tresversal en toles conceyalíes del Aytu. y sofitaremos tolos proyeutos que, d’una forma real, segura y digna, puedan llevase a cabu. Paeznos que más que munchos proyeutos, debe lluchase por aquellos que realmente puen llevase a la práutica pa que d’una manera normal y efeutiva la llingua “entame a ser normal” nel Conceyu de Xixón (a pesar de dalgunos). Asina mesmo, paeznos perbién que se cuente cola Academia como másimu muérganu llingüísticu asesor, como nun podía ser d’otra miente.

Berto Cobreros

(1) Nel Boletín del SUATEA, Febreru-Marzu 2004.