Na última reforma l’Estatutu: ¡oficialidá! (con perdón).(1)

Delles veces ye desesperante acertar nes cábales qu’ún fai en viendo cómo se desendolquen les coses. Tamos refiriéndonos al artículu apaecíu nesti Boletín hai, xustamente, un añu . Nél dábemos anuncia d’unes nubes muncho prietes pal Asturianu na enseñanza. Y finábemos con una serie midíes que camentábemos imprescindibles pa que la Llingua Asturiana nun morriera dafechu:

• Llei d’Oficialidá de la Llingua Asturiana acompangada d’una Llei económica que permita los pasos siguientes.

• Creación d’una Conseyería de Política Llingüística y Normalización Social de la Llingua Asturiana, con presupuestu y capacidá normativa. Capacidá tresversal d’intervención nel restu de l’alministración.

• Curriculum d’Asturies nel que se contemple la Llingua Asturiana nes mesmes condiciones académiques y llegales que’l castellanu. Competencies nel 45% del currículum d’Asturies.

• Ordenances de la Llingua Asturiana nos conceyos.

• Incorporación plena de la Llingua Asturiana en tolos medios de comunicación públicos y nes empreses arreyaes a ellos.

• Campañes de fomentu del emplegu de la Llingua Asturiana na empresa privada.
Midíes toes elles que siguen siendo vixentes (yérenlo hai trenta años cuando entamó la llucha: seránlo “per secula seculorum”...) ya imprescindibles al marxe de que se faigan, con posterioridá, planes de normalización y midíes de proteición o promoción. Reafirmámonos, pues, en toes elles una vez más, esperando –inútilmente, ¿suénavos la frase: glayar en castañéu?- que dalgún gobiernu les asuma como marcu fundamental pal desendolcu d’una política llingüística que desconocen esti y tolos gobiernos que yá carecimos. ¡Que dexen yá de facer xirigoncies cola llingua!¡Qué espectáculu más vergoñosu oyer –na precampaña de pandereta que ficieron- a los nuestros políticos tirase los trastos del bable a la cabeza!¿De qué planeta aterricen?¿Por qué nun van a la plaza toros –que tanto-yos gusta- a pegase ente ellos y dexen a la ciudadanía al marxe de les sos fobies, filies, neures y complexos? En fin, será’l signu los tiempos...

Ta na palestra’l curriculum de Llingua Asturiana pa la educación infantil. Y lo que tenía que ser un motivu d’allegría convirtióse, una vez más, en motivu de desesperanza. Nel mesmu Boletín que citamos al entamu, el del añu pasáu, asoleyóse otru artículu, Enseñanza de y en Llingua Asturiana. Reflexones pal debate, nél finábemos cola frase: Esperemos que l’alministración dea marcha atrás col so proyectu d’introducción del Asturianu n’infantil y....
Esperar por esperar: taba claro lo que pretendíen y taba claro que diben facelo asina a costafecha. A los resultaos nos remitimos.

Siempre fuimos de la idea de que l’alministración taba dando los pasos precisos, calculaos a mou, ensin priesa (¿suénavos de dalgo Crónica d’una muerte anunciada?) pa dir matándola ente toos y llueu poder dicir que morrió ella sola. Dende’l puntu vista educativu nun hai dulda:

- Primero fueron los famosos conciertos que nos dexaben, cuasi por caridá dar asturianu en dellos centros pilotu nos que nunca creyeron.

- Dempués, en cuantes tuvieron que xestionalo too ellos entamó la gadaña’l so trabayu. Estableciéronse hores, ratios, bolses especilaes de docentes –cuasi siempre insuficientes-, optatitividaes, despaición de fondos, desvíos de dellos alumnos/es p’asturianu y de dellos otros pa idiomes-de-prestixu-colos-que-se-ganen-perres-y-que-si-nun-los-esudies-tas-perdíu-chaval, etc...

- La situación güei ye la siguiente -siguiendo esi llabor calláu de desaniciu por parte de l’alministración – cuasi trenta años dempués:

1. Universidá:

La universidá debe tener unos estatutos, que deben tar en vigor, y que deben dicir daqué asina como que va respetase a les persones que falen asturianu y que nun les va marxinar. Dica poco, un doctorandu foi marxináu por falar/escribir n’asturianu y nun pudo presentar la so tesis.
Paez ser qu’hai un títulu d’Especialista en Llingua Asturiana y otru d’Espertu en Llingua Asturiana que con gran ésitu realiza una montonera de profesores y mayestros cada añu académicu. Lo que nun ta claro ye l’estatus, la validez llaboral, económica, de futuru, etc que tienen dambos títulos. Paráivos a pensar nello...

Acabóse: nun hai más. Como nun hai Oficialidá nun valen pa nada. Si nun lo creéis preguntái al Conseyu d’Universidaes...¿Camudará la cosa colos cambeos que s’avecinen...?¿O lo único que veremos sedrá una vuelta de tuerca más...? Al tiempu...

2. Escueles d’idiomes y adultos

Nes escueles d’idiomes nun hai nada de nada. Acabóse. Como nun hai Oficialidá nun s’almite la Llingua Asturiana nestos centros que, pola contra, formen en llingües-que-si-valen-porque-tienen-futuru-y-tu-chaval-si-nun-les-estudies-nun-vas-ser-nada.
Los adultos que quieran formase y deprender la so llingua, si tienen suerte y hai daquién que lo enseñe que yá ye muncho dicir, tienen unes orientaciones(?) pa ello. Pero como nun ye oficial nun cuenta pa ná nos curricula d’adultos. Acabóse.

3. Enseñances medies:

En bachilleratu esiste, tolos años, cuasi testimonialmente, un grupín d’alumnos que la cursen siendo conscientes que: tuvieron que llograr una ratio mínima o solicitar ayuda a los sindicatos pa llogralo; como optativa que ye, namái tien delles hores a la selmana; el profesor/a que-yos la dea en primero pue que nun seya’l mesmu qu’en segundu; hasta esti cursu nun tuvieron llibru; nun ye una asignatura qu’entre na PAU porque nun tien futuru na universidá porque nun tien futuru económicu porque nun ye una llingua-de-prestixu-de-les-que-valen-pal-futuru-y-entren-na-pau-y-si-nun-les-estudies-chaval-nun-tienes-nada-que- facer-nel-futuru. Acabóse.

En secundaria, Iyán, vamos a llamalu, que ye un chaval que saca bones notes en toles asignatures y, cosa rara, escoyó Llingua Asturiana alcuéntrase con que: tien dos hores a la selmana porque ésta nun ye una llingua oficial como’l castellanu; ye optativa colo cualo tien que renunciar a Francés o Alemán; ye mui posible que nos cuatro años de secundaria conoza a cuatro profesores; tien de compartir clase colos que fuxen de Francés o Alemán porque-yos resulten mui difíciles –da igual que quieran Asturianu o non-; compartirá la clase tamién colos repetidores que fuxen d’eses llingües pol mesmu motivu y nun quieren facer nada –dieren Asturianu dalguna vez o non-; compartirála igualmente con aquellos repetidores que s’enquisten nel sistema educativu porque ésti nun sabe da-yos una solución. Preguntaréisme ¿qué fai Iyán nesa clase? Pues...ocúrreseme qu’esperar a tener la edá pa colar pa Cultura Clásica, como yá ta pasando. Acabóse.

4. Enseñanza primaria

Antañu, la cosa en Primaria taba, dientro lo malo, bastante bien: teníen dos sesiones porque nun yera una llingua oficial; podíen tener un profesor cada añu o cada dos; nun teníen llibros, dempués yá los tuvieron pero ¿quién encargaba llibros si los pas se negaben a mercalos?, llueu vino la normalización (?) y mercábense. Diréis que taben como agora en Secundaria. Sí, pero con una diferencia: en Primaria yera voluntaria y apuntábase a ella la mayoría de los neños onde se ponía clase. Nun competía con denguna llingua extranxera –como tien que ser: onde se vio que’l deprendimientu d’una llingua vaya a la escontra d’otra: equí: Asturies is different.

Pero la cosa camudó. La gadaña dispiertó y segó pela freba. Anguañu, col nuevu curriculum, y viendo l’éstiu que tenía l’asignatura a pesar de tolos pesares, optóse por ufiertar como alternativa a l’asignatura d’Asturianu, una riestra actividaes goloses pa los pas. Asina, puen llevar los neños a lleer y otres actividaes na biblioteca, a avezase col usu de les nueves tecnoloxíes de la información, etc... ¿Pero nun diz la Llei que nun se pue avanzar materia? Por exemplu los que nun van a Relixón nun puen avanzar materia...¿entós? Eso da-yos igual a los nuestros políticos. Acabóse.

¿Cuántos cursos camentáis que-y queda a la Llingua en Primaria? Y dirán: morrió ella sola...

5. Enseñanza infantil

Quedaba la enseñanza infantil ensin ufiertar clase de Llingua Asturiana. Siempre se pidió por parte del SUATEA la incorporación de l’asignatura nesti nivel por consideralo fundamental na formación de la persona. Siempre naguó’l sindicatu pola espublización por parte d’especialistes de testos de calter teóricu que la sofitaren pero los especialistes nunca recoyeron el guante. Los nuestros especialistes universitarios ¿nun ven la necesidá d’enseñar en y la Llingua Asturiana n’Infantil?¿Nun se decaten que cuando saquen l’estudiu teóricu yá va ser tarde, que va tener que competir, una vegada más, col inglés: yá s’encarga l’alministración d’ello?

Cuéntase, nesti sindicatu, con una encuesta na que se nos daba la razón: el profesoráu d’infantil considera necesaria la introducción de la asignatura nesa etapa con especialistes y demanda formación pa sigo mesmo.

Remitímonos a lo dicho más p’arriba: nel artículu nel que se falaba de la introducción del Asturianu n’infantil y de la enseñanza n’Asturianu, acabábemos diciendo: “Esperemos que l’alministración dea marcha atrás col so proyeutu d’introducción del Asturianu n’infantil y acueya estes reflexones como puntu de partida pa una real normalización de la enseñanza de la Llingua Asturiana y en Llingua Asturiana.” En cuentes d’ello ¿qué ficieron?... Y ye que víase venir.

La gadaña entró otra vez n’aición y volvió a segar pela freba. Saquen el curriculum y acaben col Asturianu na etapa más importante. Métenla como daqué etéreo, globalizao y folclórico ente la madreña, la panoya y la danza prima…Eso contando cola bona disposición del profesoráu. Acabóse. Y llueu dirán que morrió ella sola...

Y agora va’l señor Riopedre y diz que los curricula cuenten con un gran consensu: de l’Academia, de los sindicatos y de la comunidá educativa en xeneral. Que lo cuelguen n’internet y tol mundu pue “facer aportaciones”: ¡la trampa d’internet!. ¿De qué consensu fala’l señor Riopedre? ¿Piensa que somos tontos?

Y llueu va’l señor Riopedre y diz, yá claramente, que la oficialidá implica obligatoriedá nun nos engañemos (sic) y qu’ellos nun tán dimpuestos a obligar a naide. Esta ye la última moda: la obligatoriedá. Pues sí, señor Riopedre, la oficialidá implica obligatoriedá, pero, como mui bien sabe usté, obliga a l’alministración. Nun se puede obligar a naide a falar una llingua si nun quier. Enantes d’esta moda taba lo de los mil bables; llueu, vieno lo de que nun ye una llingua; dempués, la falta de consensu; agora, la obligatoriedá… ¿Quo usque, fsa…?


Esti ye’l panorama col que nos enfrentamos a la cabera (esperemos equivocanos esta vez) reforma d’un Estatutu que nos vieno dau dende Madrid, onde nos conocen tan bien... Un panorama mui bien calculáu: fueron adulces cerrando puertes, trancando víes y esperances, escosando les ilusiones del profesoráu, faciendo oyíos sordos a cualisquier propuesta de supervivencia d’una enseñanza digna de la Llingua Asturiana. Al final, vais velo, dirán morrió ella sola, ficimos lo que pudimos.

Ante tala situación ¿qué fadría un gobiernu que tuviere un mínimu pesu específicu, y una poca vergoña, na so comunidá?:

- Declaración d’Oficialidá de la Llingua Asturiana, acompangada d’una memoria económica que la sofite y permita un desendolcu de la mesma en forma de Lleis.

- Creación de la Conseyería de Política Llingüística.

- Introducción de l’asignatura d’Asturianu nel Currículum col mesmu estatus que’l Castellanu.

- Entamu de polítiques de desendolcu enconómicu rellacionades cola Llingua.

- Ordenances municipales nos Conceyos.

- Incorporación de la Llingua Asturiana nes empreses de comunicación públiques.

- Campañes de fomentu de la Llingua Asturiana nes empreses privades.

- Polítiques de fomentu de la edición en Llingua Asturiana, lliteraries o non.

Si falta daqué podéis uvialo a la direición del Sindicatu: vamos incorporar les vuestres propuestes prestosamente. ¿Conocéis si dalguna d’estes midíes foi llevada a la práutica nel orde que les presentamos? Porque l’orde debería ser esi. Lo que siempre diximos: primero los gües, llueu’l carru.

Ante esti panorama glayaremos una vez más, pero con perdón y sin molestar, ¡oficialidá!.

Berto Cobreros

(1) Nel Boletín del SUATEA. Mayu de 2008