Delles notes pa la reflesión. (1)
1. Consideraciones previes y xenerales.
- Vamos partir de la premisa que vien darréu: la espresión escrita na clase de Llingua (de cualisquier llingua) ye la hermana probe si la comparamos col tratamientu de la Espresión y Comprensión Oral, de la Llectura, la Gramática, la Ortografía, etc... cuestiones toes elles que, mal que bien, tienen un tratamientu “sistemáticu” nel aula.
- La espresión escrita ye la estaya más difícil de les clases de Llingua, dende’l puntu vista de los nuestros alumnos/es. Ello ye asina porque cuando un alumnu/a -o cualisquier persona- garra’l bolígrafu y se pon delantre d’una fueya en blanco pa redactar un escritu tien d’atropar nun intre y reflexar nel papel tolos conocimientos que tien alquirio a lo llargo de la so curtia o llarga vida ( dende los puramente gramaticales, ortográficos, testuales, de conocimientu de la materia de la que va escribir, ... fasta, podríemos dicir, de la so conceición de la ralidá que lu arrodia).
- Ye perdifícil un tratamientu sistematizáu de la espresión escrita si tenemos en cuenta los curricula baxo los que tien que trabayar el profesoráu d’asturianu. Primero, porque ellos mesmos nun sistematicen el tratamientu d’esta estratexa – paez como si los dexaren a la bona voluntá del profesoráu de turnu-. Segundo, porque los programes cuasi nun permiten dedica-y “hores” al tema pola sobrecarga de materia y el poco horariu que carecen. Tercero, porque ye realmente difícil atopar tiempu pa facelo, ye difícil motivar al alumnáu pa qu’escriba, ye difícil face-yos ver la utilidá que tien el dominar la escritura (camentamos que la escritura “ye un arma cargada de futuru” si tenemos en cuenta que va permiti-yos espresar los conocimientos, los sentimientos, la so visión de la realidá, disfrutar con ella, procura-yos un empléu, etc).
A pesar d’estes consideraciones xenerales, enzancos que dificulten la bona llabor del profesoráu, muchos/es profesores, conscientes del papel importantísimu que xuega una bona espresión escrita nel futuru de los mozos/es colos que trabayen, lláncense a facer de les sos clases, sinón a tiempu total a lo menos en dellos momentos de les mesmes, una especie de taller d’escritura que recuerda a los tradicionalmente llamaos: Talleres lliterarios.
El llabor del profesor/a nestes clases dexa de ser el tradicional, onde:
• El profesor ye’l depositariu infalible de tol saber que tien que incorporar el alumnáu, nel momentu qu’él diga.
Y pasa a xugar otru tipu de papel:
• El profesor suxer, anima, propón y afala, en tol procesu, los escritos de los alumnos/es. Escribe con ellos/es.
• Les correiciones fáense nel momentu d’escribir- el profesor suxer formes, pallabres, disposición de los párrafos, llugares de busca d’información, ortografía...- y los sucesivos borradores de los escritos van guardándose pa emplegase notres ocasiones que se necesiten. Lo cualo implica que cuando l’escritu se peracaba cuasi nun fai falta presentalu porque’l profesor siguió tol procesu: la valoración yá nun ye una nota a la vista d’un escritu acabáu, sinón que se valora tol procesu d’escritura. Ésta ha ser positiva siempre porque, al tar guiada por el profesor, él sabe cómo y cuánto trabayó l’alumnu/a. Amás, lo que menos-y importa al alumnu, nesti procesu, ye la nota: impórta-y más ver peracabáu esi ecritu que fexo “a medies” col profesor y lleelu delantre los compañeros. Les correiciones, poro, nun van ser rayes y tachones, sinón comentarios, suxerencies d’escritura, d’ortografía, de gramática, de colocación de párrafos, de vocabulariu, de conectores... Ensin escaecer otros métodos de correición: entrevistes sobre’l trabayu fechu, comparación y comentariu de los primeros escritos y los que va faciendo de según pasa’l tiempu,... Tamién emplega la correición “inter pares” porque sabe que ye beneficiosa pa los dos: pal que corrixe, porque-y desplica los fallos al compañeru y a la vez afianza los sos conocimientos, y pal correxíu que, cuántes veces, deprende meyor d’un igual que del profesor.
. Los oxetivos de la correición pasen a ser:
1. Informar al alumnu/a sobre’l so testu.
2. Da-y una impresión global.
3. Da-y soluciones a los errores.
4. Conseguir que modifique’l testu.
5. Da-y instrucciones pa redefinir párrafos, pa correxir faltes, pa meyorar la escritura, pa reparar nos errores, pa que deprenda gramática y ortografía- aplicades al so testu.
6. Desarrollar les sos estratexes de composición.
7. Deprender nueves técniques de redaición.
8. Etc...
• Los testos escritos dexen de ser una nota nada más porque, agora, el profesor da-yos un valir práuticu. N’efeutu, el profesor considera que tolos testos qu’escribe un/a alumnu/a, pa que se consideren útiles, pa que-yos dean un ciertu valir, han tener una utilidá: dende la satisfaición d’espresar los sentimientos, pasando pola participación nun concursu lliterariu, fasta la publicación nel periódicu del centru, murales, confeición de llibros pa la biblioteca, intercambeu pel corréu ellectrónicu con otros centros, piticiones al direutor del colexu, cartes pa la seición “cartes al direutor” de dalgún periódicu, ... de según el tipu de testu que tengan fecho.
2. Nun quixéremos acabar estes reflesiones ensin citar una mínima pero imprescindible bibliografía que pue agabitar a esti tipu de profesoráu que se llanza a francer unes clases aburríes y monótones:
- CASSANY, D. (1993) Reparar la escritura. Didáctica de la corrección de lo escrito. Graó, Barcelona.
- DELMIRO COTO, B.(2002) La escritura creativa en la aulas. En torno a los talleres literarios. Graó, Barcelona.
- MUÑOZ, M. (1983). La poesía y el cuento en la escuela. Consejería de Educación y Juventud de la Comunidad de Madrid. Madrid.
- ADELA KOHAN, S. (2004) Taller de escritura: el método. Un sistema de trabajo para escribir y hacer escribir. Alba editorial, Barcelona.
- VV.AA. (2003) ¡Al ataque, mis plumillas! Actividades para imaginar y escribir. Aljibe, Málaga.
Berto Cobreros Gil
(1) Nel Boletín del SUATEA. 6 de Mayu de 2005
No hay comentarios:
Publicar un comentario