LA ESPRESIÓN ESCRITA NES CLASES DE LLINGUA Y LLITERATURA (II) (1)


Continuamos nestes llinies col tema de la didáutica de la escritura en clase. Teníemos dicho yá, o diéremos a entender, qu’hai profesores que quieren francer delles inercies nel so trabayu diariu; qu’esta estaya ye la más difícil de trabayar pa neños y profesores; que ye una estaya perimportante pal futuru de los escolinos/es; qu’hai maneres diferentes de plantegase esti trabayu en clase (de xuru que munches d’elles válides); que camuden los oxetivos de según el papel qu’asuma’l profesor/a y, pa finar, que ye un procesu lentu y trabayosu pal profesor/a porque primero tien qu’asumilu y llueu camudar l’enfoque que-y da a la materia (y non siempre se ta dispuestu a lo uno nin a lo otro).

Amosamos güei una serie de reflexones y premises, que renunciamos a fundamentar en profundidá por problemes d’espaciu:

• Realmente queremos camudar la práutica diaria d’escritura del alumnáu. (Lo cualo nun lleva arreyao renunciar al llogru de los oxetivos “de tola vida”: debemos tener claro que puen llograse oxetivos ortográficos, gramáticales, sintáuticos, morfolóxicos... cola práutica diaria de la escritura.)

• Tamos convencíos que los escritos de los alumnos/es han tener un valir posterior, aparte les notes; ello ye, han ve-yos una utilidá posterior. (De poco val que mandemos escribir un testu dempués de lleer un modelu a imitar pa, a continuación, poner la nota. De poco val que l’oxetivu de la escritura seya l’aprobáu o’l suspensu. L’alumnáu tien d’asumir qu’escribir ye útil pa munches coses, ente otres: pa deprender, pa pasalo bien creando testos lliterarios, pa construir crítiques, pa dar la opinión razondamente, p’amosar una postura d’opinión, pa redautar una solicitú de trabayu, pa reescribir los nuestros propios testos o los d’otros, etc. Pa ello, hemos partir de los sos propios testos como un rexistru llingüísticu más)

• Consideramos el trabayu de borradores como una parte fundamental de tol procesu d’escritura. (Equí ye perimportante’l trabayu del profesor/a, ayudando, afalando, “escribiendo con”, esplicando, nel momentu que se demande, la gramática, la sintásis, la morfoloxía, los conectores, la estructuración en párrafos...)

• Non siempre van ser testos completos los qu’escriban. (Dende la carauterización d’un personaxe determináu, hasta entamos d’escritos oficiales, pasando por argumentos, diálogos, descripciones, esposiciones, entamos o finales d’histories, microcuentos, etc)

• Los alumnos/es puen trabayar en pareyes o equipos, si así lo escueyen. (Ye más, vamos animalos a ello. Los motivos son dos: nun debemos desaprovechar el trabayu “inter pares”, per un llau; pel otru, nun ye lo mesmo correxir venti escritos “pa poner nota”que diez o seis p’aportar otros sentíos, otres redaiciones, otra ordenación de los párrafos, otru emplegu d’axetivos, de frases feches,...)

• Nosotros/es vamos a “escribir con” ellos/es. (Ello ye, los alumnos van “ver” al profesor pensar, intentar, enquivocase, buscar la pallabra más afayadiza, consultar diccionarios,...trabayar con ellos. Y van decatase qu’escribir ye difícil tamién pal profesor... Lo que nun ye de recibu ye la siguiente xera: “fai una carauterización d’un prsonaxe” -dempués de lleer dos o tres en clase)

• L’oxetivu nun ha ser sólo sacar una nota sinón escribir bien un testu y que vean la so utilidá posterior. (Son munches les utilidaes d’un testu dependiendo del ámbitu nel que tea basáu: familiar y d’amistaes, personal, llaboral, académicu, social, conversacional, narrativu, instructivu, predictivu, espositivu, argumentativu,.... Y son munchos, toos, los ámbitos que podemos recrear o simular nel aula.)

• Nun debemos escaecer que cuando “mandamos un trabayu” tamos obligaos a proporcionar: les ferramientes afayadices pa facelu o, polo menos, indicar el llugar o llugares onde los alumnos/es puedan facese con elles; los oxetivos que perseguimos, formulaos de manera clara; les maneres posibles de facelu y cómo vamos valoralu. Inda más, si queremos qu’interioricen lo que tán trabayando hemos rellacionalu con un deprendizaxe anterior, de tala forma que lo fecho seya significativo. (Asina, hemos proporciona-yos: un material “llingüísticu de base” dende’l que partir; dos o tres oxetivos que seyan capaces d’algamar; dos o tres variantes nel métodu de trabayu; los criterios que vamos siguir pa valoralu y cómo vamos correxir cada escritu: dende los signos que vamos emplegar na correición, hasta los items que vamos valorar. Dempués, ye’l momentu de sentase a trabayar con ellos, de desplicar la sintasis, la morfoloxía, la ortografía, la derivación, etc...”sobre’l terrén” que ye la fueya en blanco o l’escritu que tán faciendo. Aprovecharemos, en cada equipu, aquel/la alumnu/a que va meyor pa que desplique coses al que nun va tan bien, yá seya a soles o con nosotros delantre p’agabitalos, valoralos y evalualos. Hemos amosar la interconexón del trabayu con la realidá pa da-y una cierta utilidá –social, lliteraria, crítica, práutica...)

• ¿Qué vamos correxir nos diferentes momentos del procesu? (tomao de Cassany):

1. Información:

- Camudar l’enfoque del tema.
- Añader más información.
- Ordenala.
- Separtar lo importante de lo que ta de más.

2. Estructura:

- Separtar los párrafos.
- Amosar la idea central de caún.
- Seleicionar los conceutos o pallabres clave a emplegar.

3. Redaición:

- Recortar les frases mui llargues.
- Añader los coneutores adecuaos.
- Seleicionar el léxicu afayadizu.

4. Correición:

- Ortografía.
- Concordancia.
- Puntuación.
- Refugar les repeticiones.

5. Presentación:

- Revisar la forma xeneral del testu.
- Comprobar márxenes, títulos...
- Curiar la caligrafía.

• ¿Qué vamos correxir nos diferentes tipos de testos?:

- Argumentación:

1. La tesis del testu.
2. Los argumentos.
3. ¿Aporta exemplos de caún?
4. Ordenación según el grau d’importancia.

- Narración:

1. Ónde y cuándo s’asitia.
2. Protagonista.
3. Personaxes qu’intervienen.
4. Argumentu.
5. Narrador, puntu de vista.

- Descripción:

1. Tema de la descripción.
2. Orde pa presentalu.

- Instrucción:

1. Qué
2. Cómo: etapes.
3. Orde.
4. Tipu de llinguaxe.


- Esposición:

1. Idea principal.
2. Partes.
3. Orde.




Un trabayu asina plantegáu implica:

• Una actualización didáutica constante.
• Una ratio afayadiza.
• Unes rellaciones diferentes nel aula que dambos, profesor y alumnos, han asumir.
• Bayura de materiales.

Persabemos que non siempre se dan estos cuatro puntos y que’l profesoráu trabaya nunes condiciones difíciles. Sicasí, nun hemos renunciar nunca a renovar la nuestra práutica diaria, si ello va en beneficiu del alumnáu de la escuela pública, col que trabayamos, dientro les nuestres posibilidaes claro.

Berto Cobreros.

(1) Nel Boletín del SUATEA. Mayu de 2007