Enseñanza de y en Llingua Asturiana. Reflexones pal debate. (1)



Fálase abondo, nestos díes, d’una idea de vieyo que toos naguamos por vela realizada dalgún día. Trátase de la enseñanza de la Llingua Asturiana pero tamién en Llingua Asturiana de delles materies del curriculum (p.ex. matemátiques, conocimientu del mediu, música…). Ye lo qu’anguaño se conoz como enseñanza billingüe, pero que cuando se fala d’ella cuasi tol mundu entiende enseñanza n’español-inglés. Non, equí de lo que vamos falar ye centros qu’enseñen n’español-asturianu, ello ye, que l’asturianu seya llingua vehicular na enseñanza, cosa perfeutamente normal si normal fuera la situación de la LA.

Persabemos los problemes de toa triba que la esperiencia que vamos plantegar trai arreyaos. Pero tamién somos sabedores que si nun se “ponen enriba la mesa” les idees, los proyeutos, les esperiencies… nunca nun van discutise. Y somos de la opinión de qu’hai que sentase a dialogar con delles idees básiques clares, sinceres y racionales. Sirvan pues estes llinies pa entamar un debate pernecesariu, urxente y naguáu polos docentes d’asturianu d’Asturies.

Dicíemos enantes qu’ésta ye una idea de vieyo y asina ye. Hai dellos años intentóse por parte de dalgunos docentes entusiastes llevala a la práutica, muncho enantes que se falare de centros billingües. Aldericóse muncho, ficiéronse planes, proyeutos, entrevistes cola alministración,… Pa ná. L’alminsitración dexó en manes d’eses persones el desarrollu d’un plan, que se-y presentó, pero qu’acabó en dalgún caxón d’esa casa. D’aquella víense munchos problemes pa llevar la idea p’alantre. Fasta güei.

Nun vamos cayer nós nel desánimu y vamos retomar la idea ufiertando delles reflexones, cuando didáutiques, cuando organizatives, por si dalguién camienta que son afechisques –másque seyamos conscientes de les dificultades qu’ello supón- y quier retomar el proyeutu en serio y con ganes. Toes elles van empobinades pa la Educación Infantil, pero perfeutamente, o quiciás meyor, podíen llevase a los centros de Primaria.

A. Requisitos previos:

(Evidentemente’l primer requisitu pa que la esperiencia seya un ésitu ye la oficialidá de la Llingua Asturiana. Sicasí, camentamos que cola Llei d’Usu tamién podríen facese coses dignes, si hubiere voluntá de desendolcala y de llevales a la práutica.)

- Enantes d’entamar una esperiencia d’introducción de la Llingua Asturiana n’infantil y d’enseñanza en Llingua Asturiana, ha entamase un debate seriu y sosegáu nel Claustru sobre la comveniencia de la esperiencia y la disponibilidá de profesoráu afayaízu. El resultáu del debate, ha ser afaláu pola Conseyería con medios humanos y materiales abondos. Ello ye, l’Equipu Direutivu, respaldáu pol Conseyu Escolar y pol Claustru, ha negociar cola Conseyería la meyor manera de llevalu a la práutica. En resumen, ha ser el Centru’l que demande la esperiencia con un bon sofitu de l’Alministración.

B. Requisitos organizativos:

- Ha contase con grupos poco numberosos. La flexibilidá de los grupos ye fundamental. Con 25 alumnos por aula nun pue llevase a cabu esperiencia dala. Han partise los grupos, ensin que la partición signfique merma del númberu de sesiones.

- El mayestru/a ha tener una bona formación na variante dialectal que fale l’alumnáu y tamién nel estándar.

- L’especialista n’Asturianu y el tutor del grupu han trabayar en comuña pa que la metodoloxía seya la mesma y los temes tean rellacionaos. Habrá pues periodos de trabayu conxuntu.

- Poro, el centru habrá tener una bona disponibilidá de profesoráu.

- Ha contase con especialista definitivu o, polo menos, estable nel centru. Amás, contaráse con

un/a mayestru/a d’apoyu pal área y proyeutu.

- Contaráse col sofitu del AMPA.

- Ye comeniente contar con un espaciu propiu.

- Estabilidá del profesoráu mentantu duren les esperiencies. La consolidación del trabayu nun pue llograse ensin la continuidá del profesoráu. Nun siempre ye fácil y/o factible’l trespasu d’información de les esperiencies al profesoráu nuevu que pue o non aceutales.

- Al profesoráu que collabore nesti tipu d’esperiencies habría que pensar en reconoce-y el trabayu fechu.



C. Cuestiones didáutiques:

- Oxetivos :

- Integrar dafechu la Llingua Asturiana nel curriculum
- Ufiertar una atención individualizada, gracies a los desdoblamientos.
- Caltener un contautu diariu cola Llingua Asturiana.
- Normalizar la presencia del Asturianu na enseñanza y de la enseñanza n’Asturianu.

- Aspeutos propiamente didáuticos:

- Los neños/es pequeños memoricen perfácil mensaxes enteros siempre que seyan curtios y respuendan a los sos intereses del momentu. Habrán crease situaciones reales nel aula. Habrá tenese en cuenta que la memoria infantil fonciona bien a curtiu plazu. Esto fai qu’escaeza rápido, si nun se retroalimenta lo deprendío. Poro, ye preciso que les sesiones seyan mui frecuentes, ello ye, diaries.

- La impartición de conteníos en Llingua Asturiana d’otres materies tará encuadrada dientru l’horariu del área específica y siguir la metodoloxía propia del área en cuestión. Esto comporta forzosamente una bona coordinación cola persona especialista n’Asturianu.

- Ye aconseyable que los conceutos del área na que se va trabayar en Llingua Asturianu s’alcancen bien, recurriendo si ye menester al español y llueu al Asturianu.

- Ha contase con un espaciu propiu, un marcu qu’acentúe la identificación espaciu-llingua, un entornu que favoreza un clima estimulante pa les actividaes de deprendimientu variades, con dotación bayurosa de materiales.

- Estudiaráse la manera de la Llingua Asturiana salga del aula y esté presente na vida escolar y familiar del alumnáu. Decorar los espacios comunes, organizar presentaciones d’esos trabayos y espacios a otros grupos del centru y a los pas. Entamar un espaciu propiu pa les cellebraciones, establecer llazos con otres escueles,…

- Ye perestimulante el trabayu con Requexos, por exemplu:

+ Llectura: con llibros, cuentos, tebeos, revistes,… pa consulta y préstamu.
+ Multimedia: requexu de les nueves teunoloxíes.
+ Xuegos: de mesa, quién ye quién, cartes…
+ Falamos: requexu pa falar ente ellos o col/a profesor/a.


Esperamos qu’estes reflexones sirvan pa poner enriba la mesa un deséu pol que nagua tol profesoráu de Llingua Asturiana. Esperemos que l’alministración de marcha atrás col so proyeutu d’introducción del Asturianu n’infantil y acueya estes reflexones como puntu de partida pa una real normalización de la enseñanza de la Llingua Asturiana y en Llingua Asturiana.

¡Qu’asina seya!

Berto Cobreros Gil

(1) Nel Boelín del SUATEA. Mayu de 2007